apportant par les foys chappons, beccasses, levrauts, et venoit volontiers un peu après midy, sus l’heure que les clercs disnoyent ou achevoyent de disner : auquel Fouquet alloit ouvrir ; mais il n’y prenoit point de plaisir à une telle heure. Car il y alloit du temps pour luy, parce que le bon homme se mettoit en raison avecques luy, tellement qu’il falloit bien souvent que Fouquet allast parler à son maistre et puis en rendre responce : qui faisoit qu’il disnoit quelques foys bien legerement. Et son maistre, d’une aultre part, n’avoit pas grand respect à luy. Car il l’envoyoit à la ville à toutes heures du jour, vingt fois, cent fois, ne sçay combien[1], dont il estoit fort fasché. A l’une des fois, voicy ce bon homme de Bagneux qui frappe à la porte et à l’heure acoustumée, lequel Fouquet entendoit assez au frapper. Quand il eut tabuté deux ou trois coups, Fouquet luy va ouvrir, et en allant s’advisa de jouer un tour de chatterie à son homme, qui vient, disoit il, tousjours quand on disne. Et se pensa comment son maistre en auroit part. Ayant ouvert l’huis : « Et puis[2], bon homme, que dites vous ? — Je vouloys parler à Monsieur, dit il, pour mon proces. — Et bien, dit Fouquet, dites moy que c’est, je le luy iray dire. — Oh ! dict le bon homme, il fault que je parle à luy, vous n’y feriez rien sans moy. — Bien donq, dit Fouquet, je m’en vois luy dire que vous estes icy. » Fouquet s’en va à son maistre et luy dit : « C’est cest homme de Bagneux qui veult parler à vous. — Fay le venir, dit le procureur. — Monsieur, dit Fouquet, il est devenu tout sourd ; au moins il oit bien dur. Il faudroit parler bien hault, si vous vouliez qu’il vous entendist. — Et bien, dit le procureur, je parleray prou hault. » Fouquet retourne au bon homme et luy dit : « Mon amy, allez parler à Monsieur ; mais sçavez vous que c’est ? Il y ha eu un catherre qui luy est tombé sus l’oreille, et est quasi devenu sourd. Quand vous parlerez à luy, criez bien hault ; autrement il ne vous entendroit pas. » Cela faict, Fouquet s’en va veoir s’il acheveroit de disner, et, en allant,
- ↑ Allusion à ces vers de la ballade de frere Lubin, dans Clément Marot :
Pour courir en poste à la ville,
Vingt fois, cent fois, ne sçay combien, etc. - ↑ Anciennement. Et puis ? étoit le premier mot qu’on se disoit dans la rencontre ; c’étoit comme l’ouverture du discours. Marot, dans son Dialogue de deux amoureux, les fait débuter chacun par un Et puis. (L. M.)
