Page:Desmarets - Clovis ou la France Chrétienne.djvu/161

Que le Roy Visigoth, d’un plus proche interest,
Seroit pour leur secours aux armes le plus prest ;
Et d’une mesme ardeur brulant pour la princesse,
Viendroit, pour la deffendre, employer sa proüesse ;
Bien qu’à l’égal tous deux soient par luy redoutez ;
Et doivent l’un par l’autre estre exclus ou domptez.
Que l’heureux ostrogoth dominant l’Ausonie,
Viendroit du jeune franc borner la tyrannie ;
Avec les peuples fiers, qui nombreux et puissans
Du Danube et du Rhein boivent les flots naissans ;
Et des vallons telins les bandes courageuses,
Et du champ allobroge, et des Alpes neigeuses.
Sigismond réveillé par ces charmans discours,
Sent mille doux plaisirs qui flatent ses amours ;
Et quittant les langueurs de sa triste souffrance,
Void revivre un rayon de sa douce esperance.
Il anime son pere ; et pour mieux l’engager,
Sçait renforcer encor la crainte et le danger.
J’aime, dit Gondebaut, ton ardeur enflammée ;
Et te remets l’honneur de commander l’armée.
Tandis qu’un long delay traisnera les françois,
De guerriers fay sans bruit le ramas et le choix,
Ou bien-tost se joindront les forces estrangeres.
Gondomar sera chef de mes troupes legeres.
Le cœur saute à tous deux par des transports soudains.
Tous deux baisent contens les paternelles mains.