ROSE DES DIEUX ALEINE SAINTE, etc.
Rose des Dieux aleine sainte,
Rose des hommes le plaisir,
Ou des grâces l’image peincte,
Si au temps on la veut choisir
Que les amours de mille fleurs
Coronnent leurs douces faveurs.
De Venus jouet & deduit
Subject au poete plaisant,
La fleur qui mieux aux Muses duit.
Encor’y a plaisir faisant
Une entreprise pour l’avoir
Au Rosier espine se voir.
Mais plaisir plus grand se presente
Quand une main douce & legiere
Cœueille ceste Rose plaisante
Et la rend au nez prisonniere
Dont s’eschauffant la belle fleur
Peu a peu flestrit sa couleur.
Rose bien duisante aux bouquets,
Plaisante a Bachus le bon père,
Duysant aux festins & banquets,
Sans elle que sauroit-on faire ?
Toute beauté d’elle se nomme,
Et de sa grâce se renomme.
