Et tant les sophistes reprenne:
Si faict ville neusve, & Raimon,
Qui en font notable sermon,
Et Morien le bon Romain,
Qui sagement y mit la main:
Si fist Hermes, qu'on nomme pere,
A qui aucun ne se compare:
Geber philosophe subtil,
A bien usé de mon oustil,
Et tant à escript de beaux dictz,
Et d’autres, plus que je ne dis,
De cette tres noble science:
Lesquelz ont par experience
Prouvé que l'art est veritable,
Et la vertu grand' & louable.
Tant de gens de bien l'ont trouvée,
Qui veritable l'ont prouvée
Dont je me tais pour abreger.
Or, mon filz, si tu veux forger
Et commencer œuvre si noble,
Il ne te fault ducat ny noble,
Au moins en grande quantité:
Suffist que sois en liberté,
Et en lieu quite soit propice,
Que nul sache ton artifice.
Prepare à droict bien ta matiere
Toute seule mise en pouldriere
En seul vaisseau, avec son eau,
Bien close, & dedens son fourneau,
Par un regime soit menée
Es
