Page:De la transformation metallique.djvu/68

Froit & sec en humide & chault,
En conservant pierre & metal
Soubz son humide radical.
C’est par le mouvement des cieulx :
Tant sont nobles & precieux.
Et saches que les elementz
Ont des cieulx leurs gouvernementz,
Obeissans, par convenance,
Elementz à leur influence.
Et plus est pure ma matiere,
Plus suis par les cieulx grande ouvriere.

Cuide tu que sus ton fourneau,
Ou sont mis ta terre & ton eau,
Et que par ton feu & chaleur,
Par ta blanche ou rouge couleur,
Tu face de moy ton plaisir,
Pour parvenir à ton desir ?
Cuides tu les cieulx emouvoir
Et leurs influences avoir
Pour infuser dedens tes drogues ?
Cuides tu que ce soient orgues,
Qu'on faict chanter à tout les dois?
C'est trop cuider en ton lourdoys.
Ne scais tu bien que au mouvement
Des cieulx est un entendement,
Qui haça bas intelligence,
Et qui faict, par son influence,
A toutes choses avoir estre.

Cy te prie vouloir cognoistre
Que haultes choses de haut lieu