Page:De la transformation metallique.djvu/64

Mon filz: aye pitié de toy
Je te supplie, & pence à moy.
Entends bien ce que te diray :
Car de rien je ne mentiray.

Regarde un peu escoutes or',
Et tu verras bien comme l'or,
Qui est si noble & precieux,
A prins sa belle forme es cieulx,
Et sa bonne matiere en terre :
Si faict la belle gemme & pierre,
Comme Rubis & Dyamantz.
Tout se faict des quatre elementz,
Quant a matiere : & quant a forme,
Le ciel la qualité informe
En l’element ja contenue,
Par qui la forme est devenue
Noble par depuration
Et longtemps en perfection.
Et toutefois, telle noblesse,
Comme d’or & d’autre richesse,
Se faict par moy, j’en suis l’ouvriere :
Nul homme n'en scait la maniere.
Et, l'entendant, si ne scauroit
Dire comment il le ferait,
Ne quelle proportion prendre
Des elementz, ny bien entendre
Combien de feu, d’air, d’eau & terre
Sy est requis,ny ou les querre,
Ne bien mesler aucun contraire,
Non plus que les substances attraire :
Ny donner telles influences