Page:De la transformation metallique.djvu/63

Soit un metal ou corps humain,
Je le perfaiz & rendz tout sain.
Je faiz temperance infuser,
Et les quatre symboliser:
Des contraires je faiz accordz
Ou jamais il n'y à discordz.
C'est la belle chaine dorée.
Que j'ay circulant decorée
Par mes vertus celestieles,
Et leurs formes substantiales.
Telement & si bien j'y oeuvre
Que tout mon pouvoir se descœuvre,
Voire si noble et si perfaict,
Que d'homme ne seroit point faict
Sans moy, sans mon art & scavoir,
Quelque bon sens qu’il sceut avoir.

Vien ça, toy qui dis scavoir tout,
Et qui entends venir à bout
De ma science tant notable,
Disant, je feray l’or potable
Par feu de charbon, baing marie
En mes fourneaux: Saincte marie
Je mesbahis de ton erreur:
Par ta foy n'as tu point d horreur,
En considerant mes ouvraiges,
Et voyant cuire tels breuvaiges
Dedens tes vaisseaux & phioles
Plus creuses que ne sont violes,
Du temps perdu & des despences ?
Je ne scay moy à quoy tu pences