Puis son soulphre le suit de pres,
Comme tout un, qui par expres
L’eschauffe petit à petit
Doulcement à son appetit.
Lors, froit se faict chault vertueux,
Et le sec, humide unctueux.
Or entens par hic & par hec,
L'humide n’est point sans son sec,
Ne le sec aussi sans l’humide :
Car l’un avec l’autre reside
Soubz une essence primitive,
Qui en est l’elementative
L'esperit & la quinte essence,
Dont notre enfant prend sa naissance.
Le feu l’enfante & le nourrist
Dedens l’air: mais avant pourrist
Au ventre de la vierge terre :
Puis en vient l’eaue qu’on doibt querre,
Qui est la matiere premiere
Dont je commence ma miniere.
Car un contraire circonstant,
Son contraire est fort resistant,
En se fortifiant, de sorte
Non tant que l’agent ne l’emporte.
Lors est le passif transmué,
Et de sa forme desnué,
Par l’appetit de la matiere,
Que toujours neufue forme attire.
Du premier ciel & grant moteur,
Est mon scavoir gubernateur:
Page:De la transformation metallique.djvu/57
Cette page n’a pas encore été corrigée
