Princes, certes, voir dire est anyeux
Aux mençongeurs qui veulent décevoir,
Pour ce au père voit on mentir le fieulx :[1]
On est souvent batu pour dire voir.
XXXVIII
Gentiellece qui les vaillans cuers duit
De courtoisie fait sa messagiere
Qui ses rapors trés gracieux conduit
Et toute gent reçoit a lie chiere ;
Si voit on bien resplendir sa lumière[2]
En une court de France solennée,
De prince hault tellement gouvernée[3]
Que personne n’y a qui toute adulte[4]
Ne soit d’honneur, dont, chose est certenée,
Selon seigneur voit on maignée duite.
Le trés hault duc filz de roy, qui est vuit
De tout orgueil et qui sagece a chiere,
Philippe bon des Bourgoignons réduit
Et les Flamens touz a soubz sa baniere,
En est le chief, en qui prudence entière
Maint, si qu’il n’a o lui personne née,
Qui en touz cas ne soit si ordonnée
Qu’on peut dire de sa trés plaisant suite,
Tant noblement est et bien dottrinée,
Selon seigneur voit on maignée duite.
