Page:De Pisan - Œuvres poétiques, tome 1.djvu/282

Trés humblement, s’il vous plaist toutevoie,
Et se guermente
Que vous dissiez vostre avis : se dolente
Vie est qu’amer ou trés joieuse et saine,
Et le livret le fait vous représente,
Si le vueilliez recepvoir pour estreine.

Mon redoubté seigneur, des meilleurs trente
Me reçoivent a vo bonté haultaine,
Cui mon service ottroy sanz estre lente,
Si le vueilliez recepvoir pour estreine.

XXII

(Christine recommande son fils aîné au duc d’Orléans.)

Très noble, hault, poissant, plein de sagesse,^[1]
D’Orliens duc Loys trés redoubtable,
Mon redoubté seigneur, en grant humblece
Me recommand a vous, prince notable,
En désirant faire chose agréable
A vous, vaillant seigneur de haute emprise.^[2]
Et si vous viens donner d’amour esprise^[3]
La riens qui soit que doy plus chier avoir
Et soubzmettre du tout a vo franchise,
Si le vueilliez, noble duc, recevoir.

C’est un mien filz, lequel de sa jonnece
A bon vouloir d’estre en son temps valable^[4]
Et desir a selon sa petitece
De vous servir, sil vous est acceptable ;

1. XXII. — 1 B n. et h.
2. — 6 omis dans B
3. — 7 A² v. vueil d.
4. — 12 B en s. cuer v.