Cette page n’a pas encore été corrigée
crime de felonnie, c' est une espece de parricide. Car en effet oseroient-ils nier, que ce ne soit de nostre eglise qu' ils ont receû la vie et l' estre spirituel ; qu' ils ont tiré leur premiere nourriture et leur premier lait ? C' est sous son empire qu' ils sont nez, et dans l' estenduë de sa jurisdiction, qu' ils font leurs courses et leurs ravages : c' est en son nom, et avecque ses livrées qu' ils luy ont commencé, et qu' ils luy continuënt la guerre. Ainsi en attaquant nostre eglise, ils font la guerre en mesme temps, et contre une mesme personne, à leur mere et à leur nourrice, à leur souveraine et à leur maistresse.
