ne peuvent preſuppoſer une infirmité humaine, c’eſt à dire, vn principe d’erreurs & de fautes ; vne maladie de la naissance, de laquelle Alexandre & Ceſar ne ſont pas exempts ; vn defaut qui traiſne apres ſoy tant d’autres defauts, en la Perſonne des plus Parfaits ; en la conduitte des plus Sages ; & en celle de Salomon meſme, ſi vous le voulez.
Les Grands euenemens ne ſont pas touſjours produits, par les grandes cauſes. Les reſſorts ſont cachez, & les machines paroiſſent : & quand on vient à deſcouvrir ces reſſorts, on s’eſtonne de les voir ſi foibles & ſi petits. On a honte de la haute opinion qu’on en auoit euë. Vne ialouſie d’amour, entre des perſonnes particulieres, a eſté la matiere d’vne guerre generale. Des Noms baillez ou pris par hazard ; les Verds & les Rouges des Ieux du Cirque, ont formé les Partis & les Factions, qui ont dechiré l’Empire. Le mot ou le corps d’une Devise ; la façon d’vne Liurée ; le rapport d’un Domeſti-
