de l’œconomie. Ils demandent la premiere Charge de la Justice, pour un homme veritablement de robbe longue, mais celebre, par le peu de connoissance qu’il a des Lettres ; mais de la Classe de celuy que nos Peres virent à Paris, quand les Ambassadeurs de Pologne y arriverent. Ils firent à cet Homme leur compliment en Latin, & il les pria de l’excuser, s’il ne leur respondoit pas, parce qu’il n’avoit jamais eu la curiosité d’apprendre le Polonnois.
Vous sousriez, Monseigneur, & vous vous estonnez de la grande Litterature de cet homme de robbe longue. Il faisoit bien d’autres equivoques, & on en conte quelques uns, qui ne me semblent pas mal-plaisans. Ce fut luy qui crût que Seneque estoit un Docteur de Droit Canon, & que, dans ses Livres des Benefices, il avoit traitté, à plein fonds, des Matieres Beneficiales. Un *** de ce temps-là luy fit accroire, que la Morée estoit le Païs des Mores ; & il n’est rien de si vray, qu’il chercha, dans la
