a esté nommée la part & l’heritage du Seigneur : le Seigneur luy a dit, je seray ton Dieu, et tu seras mon Peuple. Dans la Maison des Patriarches, cette preference est tousjours tombée d’un costé, à l’exclusion de tout le reste. Les Cadets ont emporté le droit d’Aisnesse, & les avantages de la Nature ont fait place aux ordres de Dieu.
Et quand le Fils de Dieu luy-mesme est venu au Monde ; outre les soixante & douze Disciples qui estoient de sa suite, & qui s’avoüoient à luy, il a appellé douze Apostres, pour luy rendre une plus particuliere sujetion, & estre plus proches de sa Personne. Entre ceux-là mesme, il y en a eu trois, à qui il s’est ouvert plus familierement qu’aux autres : Il leur a montré des marques de sa Divinité, qu’il avoit cachées à leurs Compagnons : Il leur communiqua beaucoup de secrets de l’Avenir, dans l’agitation de sa prochaine mort, & parmi les inquietudes de ses dernieres pensées.
