disoit ordinairement, Je ne suis pas Chancelier de France ; Je suis Chancelier du Roy : Il pouvoit adjouster ; & de la Reine sa Mere, de laquelle il estoit Creature. Pour ne rien dire de pis, il me semble qu’il ne doit point estre loüé de ce mauvais Mot.
Les bons Princes protestent eux-mesmes qu’ils sont à autruy, & qu’ils se doivent à la Republique. A plus forte raison luy doivent-ils les Magistrats, & les autres Officiers. Ils n’ont donc garde de donner & d’oster en mesme temps une mesme chose : Ils ont l’ame trop noble, pour estre capables d’une si vilaine avarice. Se repentiroient-ils de leur liberalité ? Voudroient-ils reprendre en secret, un Present qu’ils ont fait solennellement à tout le monde ? J’appelle ainsi l’administration de la Justice, les bons Juges, & les bonnes Loix.
Sans doute, cet Homme de Milan contoit la France pour rien : Il ne pouvoit pas luy mieux faire voir, que par là, qu’il
