Quand nostre Philippes de Commines apprit, par la bouche du Duc de Venise, la Ligue, qui avoit esté concluë, contre le Roy Charles son Maistre, entre la Seigneurie, le Pape, le Roy des Romains, &. cette Nouvelle, dont il ne s’estoit point douté, durant le temps de son Ambassade, le surprit de telle sorte, s’il en faut croire le Cardinal Bembe, qu’il faillit à perdre subitement l’esprit. Et quand il fut sorti du Senat, avec un Secretaire de la Seigneurie, qui avoit eu ordre de l’accompagner, Mon amy, luy dit-il, je te prie de me redire ce que le Prince m’a dit, car j’ay oublié toutes choses : Je ne sçay qu’est devenuë, ni ma memoire, ni ma raison.
Cet Exemple est singulier, soit du Secret gardé, entre tant de Senateurs, & tant d’Ambassadeurs, qui avoient traitté la Ligue ; soit de la surprise du Nostre, qui les voyant tous les jours, ne sentit jamais rien de leur Traitté. Neantmoins il ne doit pas perdre, pour cela, la bonne
