de de rien donner au Hazard. Ils voudroient un Dieu, pour caution, & plus d’un Oracle, pour asseurance, dans les moindres choses qu’ils entreprennent. Leur Maistre peut avoir du courage ; Mais la timidité de leurs conseils emousse tousjours la pointe de son courage : Ils le retiennent tousjours, & ne le poussent jamais.
Prenez garde, je vous prie, à ces habiles Poltrons, dont Aristippe nous vient de parler : Voyez comme une nouvelle experience met leur sagesse en desordre, comme un simple bruit, sans autheur, & sans fondement, les jette hors de leur assiette ordinaire. Quelque graves & dissimulez qu’ils soient, à la premiere alarme, le masque leur tombe à terre. On apprend toutes les affaires, sur leur visage ; On y lit l’apresdinée les Depesches, qu’ils ont reçeuës le matin (nous disoit un jour le bon & sage Monsieur Conrart.) Quoy qu’ils taschent de se couvrir, par un silence contraint, l’émotion de leur esprit paroist tousjours, dans le trouble de leurs yeux.
