priſe de Smirne, que poſſedoiẽt les Cheualiers de Rhodes, recourut aux ingenieurs qui luy dreſſerent de grands cercles ou gabions couchez en Cylindre, de grandeur deſmeſurée capables chacun de deux cens hommes, qu’il fit à l’impourueu rouler dans les foſſez de Smirne qui les rempliſſoient & attaignoient à la plus part de la hauteur des murailles, & au meſme inſtant les ſoldats de tous coſtez montez facilement ſur ces gabions auec des eſchelles de mediocre grandeur, preparez en grand nombre gaignerent tout en vn moment les creneaux & les tours, & par ce moyen la ville fut tout à coup comme inondée de ceſte multitude infinie de Barbares, auſquels ceux de ceſt Ordre firent teſte tant que les forces & le ſang leur peut ſuffire, & ſans parler d’autre choſe que de vaincre ou mourir y laiſſerent leurs vies.
Le cvr. Qu’eſt-ce Cylindre ?
L’Avt. Vne piece de bois longue & ronde, laquelle on roule ſur la terre qu’on veut applanir.
Gouppille. Petite piece de fer platte en
