prouiſion de feux artificiels. Les Maltois l’année mil cinq cens ſoixante cinq, au fort ſainct Elme, ietterent aux lieux les plus perilleux de l’aſſaut, des tables ſemées de pointes de fer, les pointes en deſſus, & des fers à cinq pointes dont l’vne tendoit touſiours en deſſus.
le cvr. Ces chauſſetrappes ou pointes de fer ne peuuent-elles ſeruir que ſur terre ?
L’avt. Par tout où elles peuuent eſtre iettées & poſées. Le grand Maiſtre de Rhodes d’Aubuſſon, l’an mil quatre cẽs quatre vingts, fit ietter dans le fonds de l’eau de la mer, qui eſtoit baſſe & gueable vers le rauelin qui s’eſtendoit depuis la tour ſainct Pierre, iuſques au bas du Mandrache, quantité de tables ſemées de pointes de fer, afin que les Turcs ne peuſſent marcher dans l’eau ſans s’offencer.
Le cvr. Tout cecy me contente, mais ie ne ſçay pourquoy Herodian appelle les chauſſetrappes tribulos, veu qu’en pluſieurs Autheurs elles ſont appellées murices, & meſmes que chauſſetrappe eſt vne eſpece de chardon appellé tribulus.
