I. L’honneur rendu à l’Antiquité
’ANTIQVITÉ des choſes a toûſiours
eſté en ſi grande conſideration
parmy toute ſorte de nations,
qu’auec grande raiſon elles luy ont
donné le titre de Venerable, comme
voulans dire que la longue
ſuitte d’années qu’elles ſubſiſtent,
leur auoit acquis ie ne ſçay quelle
obligation de reſpect & d’honneur.
Philoſtrate liu. 5. de la vie d’Apollonius.
Ce qui auoit autrefois inuité les Gades à luy baſtir
vn temple dans leur ville, pour monſtrer qu’ayant
en ſoy quelque choſe qui tenoit de la diuinité, auſſi luy
eſtoit-il deu vne grande reuerence. Et quoy qu’à dire
vray, cecy ſoit notament à l’égard des choſes animées,
ſi eſt-ce en quelque façon que cela ſe doit eſtendre au
reſpect meſme des inanimées, & ſur tout des baſtimens
anciens qui ont pour leurs Autheurs des perſonnes illuſtres
en dignité & en merites. C’eſt de là que Rome ſe
vante d’auoir vn Remus & vn Romulus pour fondateurs
que Carthage tire la gloire de ſon origine de la
Reyne Didon : & que tant d’autres empruntent des
auantages pour ſe rendre recommandables à la poſterité.
Verité qui eſt ſi cognuë de tout le monde, qu’ayant
à décrire icy les merueilles qui publient hautement
par tout l’Vniuers la gloire & la renommée de la
Maiſon Royale de Fontainebleau, i’ay creu que ie ne
le pouuois mieux qu’en commençant par ſon antiquité,
qui eſt de cinq cens ans, & la perſonne qui premiere
en ietta les fondemens.
II. Le Roi Louys VII. Fondateur du Chaſteau Royal de Fontainebleau Et combien qu’à parler ſincerement l’on ne puiſſe pas aſſeurer quel de nos Roys en eſt le fondateur, par ce qu’il ne s’en trouue rien d’écrit, ny aucune marque qui puiſſe obliger d’en faire vn iugement certain. Si eſt-ce à tout le moins qu’il eſt ſemblable, que l’honneur de ſa fondation eſt deu à Louys Septiéme, ſurnommé le Ieune, à la diſtinction de ſon pere