Procureront par tout que le Sainct Sacrement soit honoré auec toute la decence & reuerence conuenable, soit quand il est exposé, en Procession, ou donné pour Viatique, & s’appliqueront de tout leur pouvoir à luy rendre vn particulier honneur, culte & reuerence.
Ils auront soin particulier d’empescher les scandales, irreuerences, & indecences qui se commettent dans les Eglises, soit contre l’honneur du Sainct Sacrement, où contre le respect qui est deu à l’Eglise, à ses Mynistres, & aux SS. Misteres, en donnant ou faisant donner auec prudence des aduis charitables aux personnes qui ne sont pas dans la decence conuenable, où faisant plainte à Monsieur le Curé & Messieurs les Marguilliers, où par toute autre voye que le zele & la prudence de la Compagnie pourront suggerer.
Trauailleront de paroistre & d’estre autres que ceux du commun dans la conduite de leur familles, pratique des vertus, & devoirs de la Parroisse, afin de donner bon
