Page:D'Orbigny - Le Conte de Floire et Blanchefleur, 1288.djvu/9

de fin or, u escrit estoit
la plus bele d'eles l'aroit.
Cele pume a Paris livrerent
et en aprés li conjurerent
que la plus bele le donast
et celi que il mius prisast.
Cascune li promet granment,
que vers li soit au jugement :
Juno plenté de grant avoir
et Pallas prouece et savoir,
et Venus li promet la feme
que de totes autres ert geme.
Paris le pume li dona
et de sa feme le hasta ;
assés le voloit mius avoir
que sens, proëce ne avoir.
Et tres bien mostroit la painture
l'amor Paris et la grant cure,
com il ses nés aparilloit
et com por li par mer nagoit.
Li coupiers ert ciers et vaillans,
d'une escarboucle reluisans ;
n'est soussiel si orbes celiers,
s'il i estoit, li boutilliers
ne peüst sans autre clarté
cler vin connoistre d'ysopé.
D'or avoit deseur un oisel
trifoire, qui molt par ert bel,
qui en son pié tenoit la geme,
plus bel ne vit ne hom ne feme :
c'ert vis celui qui l'esgardoit
que vis estoit, si voletoit.
Li rois Eneas l'em porta
de Troies quant il s'en ala,
si le dona en Lombardie
a Lavine, qui fu s'amie.
Puis l'orent tot li ancissour
qui de Rome furent signor
dusqu'a Cesar, a cui l'embra
uns leres, qui la l'aporta
u li marceant l'acaterent
et por Blanceflor le donerent.
Çou l'en donent par droit marcié,
et il s'en font joiant et lié,
k'a double cuident gaaignier
se il s'en pueent repairier.
Li marceant ont bon oré,
en lor païs sont retorné,
en Babiloine l'ont menee,
a l'amiral l'ont presentee,
et il l'a tant bien acatee,
de son or l'a set fois pesee :
cele a gent cors et cler visage,
bien sanle feme de parage.
Por sa grant biauté molt l'ama
et bien garder le commanda.
Li marceant en sont tout lié,
car assés i ont gaaignié.
Et li borgois est revenus,
au roi fu tos l'avoirs rendus.