Page:D'Orbigny - Le Conte de Floire et Blanchefleur, 1288.djvu/7

"Sire, fait il, que puet çou estre
que Blanceflor lais et mon mestre ?
Blanceflor pri que viegne o moi."
Dont l'ot otrïement au roi,
muire sa mere u voist vivant,
que il l'avra sans contremant.
Flores l'otroie a quelque paine.
Li rois son cambrelenc demaine
li a cargiet o grant conroi,
tel que convient a fil de roi.
Es les vos venus au castel
de Montoire, le fort, le bel.
Li dus Joras molt liés en fu,
a grant honor l'a recheü,
et s'ante li a fait grant joie,
mais ne li caut de riens qu'il oie :
por Blanceflor qu'il n'a, s'amie,
en noncaloir a mis sa vie.
Aprendre l'en maine Sebile
o les puceles de la vile,
savoir se il l'oublieroit
et en l'escole autre ameroit.
Mais nul oïr ne nul veoir
ne li puet faire joie avoir ;
il ot assés, mais poi aprent,
car grant doel a u il s'entent.
Amors li a livré entente,
el cuer li a planté une ente
qui en tous tans flourie estoit
et tant doucement li flairoit
que encens ne boins citouaus
ne giroffles ne garingaus.
Et cele odour rien ne prisoit ;
toute autre joie en oublioit :
le fruit de cele ente atendoit,
mais li termes molt lons estoit,
çou li ert vis, du fruit cuellir,
quant Blanceflor verra gesir
jouste soi et le baisera,
le fruit de l'ente cuellera.
Flores atent a quelque paine
tot le terme de le quinzaine.
Quant il vit qu'ele ne venoit,
dont sot bien que gabés estoit,
et si doute forment et crient
que morte soi quant el ne vient.
A tant laist le mangier ester
et tot le rire et le jüer,
le boire laist et le dormir.
Cil se criement de son morir.
Li cambrelens au roi le mande.
Il en ot doel et ire grande.
Del venir li done congiés.
La roïne apela iriés :
"Certes, fait il, la damoisele
mar acointa ceste novele !
Puet estre que par sorcerie
a de mon fil la drüerie.
Faites le moi tost demander,
ja li ferai le cief cauper.