Page:D'Orbigny - Le Conte de Floire et Blanchefleur, 1288.djvu/10

[La roïne s'est porpensee
et si parla comme senee :
"Sire, fait ele, que dirons
quant vostre fil Flore verrons
et quant il repairiés sera,
s'amie nos demandera ?
Quant il demandera sa drue,
que dirons nos qu'est devenue ?
Par foi, jou ai molt grant paor
qu'il ne s'ocie por s'amor.
- Dame, fait il, or en pensés.
C'est vostre fius, sel confortés.
- Sire, fait ele, a moi entent :
car faisons faire un tomblel gent,
fais soit de marbre et de cristal,
et d'or et d'argent li esmal.
"Morte est Blanceflor", ce dirons,
et nostre fil conforterons.
- Dame, fait il, tost l'estuet faire,
car Flores, çou saciés, repaire."
Dont manderent machons vaillans
et boins orfevres bien sachans.
Faire lor fait un tel tomblel,
nus hom de char ne vit si bel.
La tombe fu molt bien ovree,
d'or et d'argent iert neelee.
N'a soussiel beste ne oisel
ne soit escrit en cel tomblel,
ne serpent c'on sace nomer,
poisson de douce aige et de mer.
Devant un mostier, sos un arbre,
sist la tombe, qui fu de marbre.
Une piere ont desus assise
que orfevre fisent de Frise.
Cele piere qui sus gisoit
de tres fin marbre faite estoit,
inde, vert et gausne, vermel ;
molt reluisoit contre solel,
si fu entaillie environ
de la trifoire Salemon.
Entremis i sont a cristal
d'or et d'argent tot li esmal.
Desor la tombe ot tresjetés
deus biaus enfans tres bien mollés.
Onques nus hom si bien sanlans
d'or ne vit faire deus enfans.
Li uns des deus Flore sanloit
plus que riens nule qui ja soit.
L'autre ymage ert ensi mollee
comme Blanceflor ert formee.
Et li ymage Blanceflor
devant Flore tint une flor ;
devant son ami tint la bele
une rose d'or fin novele.
Flores li tint devant son vis
d'or une gente flor de lis.
L'uns jouste l'autre se seoit,
gente contenance faisoit.
Desor le cief Flore l'enfant
ot un escarboucle luisant ;