Buona pulcella fut Eulalia ;
Bel avret corps, bellezour anima.
Voldrent la veintre li Deo inimi,
Voldrent la faire diavle servir.
Elle n’out eskoltet les mals conselliers,
Qu’elle Deo raneiet chi maent sus en ciel,
Ne por or ned argent ne paramenz,
Por manatce regiel ne preiemen ;
Ne ule cose non la pouret omque pleier
La polle[1] sempre non amast lo Deo menestier
E por o fut presentede Maximiien
Chi rex eret à cels dis sovre pagiens.
El li enrotet dont lei nonque chielt[2]
Qued elle fuiet lo nom chritien
Ell ent a[3] dunet lo suon element ;
Mels sostendreit les empedementz
Qu'elle perdesse sa virginitet ;
Por o s'furet morte à grand honestet.
Enz colpes non avret, per o no s'coist[4].
A ezo[5] no s'voldret tolir lo chief.
La domnizelle celle kose non contredist ;
Volt lo seule lazsier, si ruovet Krist ;
In figure de colomb volat à ciel.
Tuit oram que por nos degnet preier
Qued avuisset de nos Christus mercit
Post la mort, et à lui nos laist venir
Par souue clementia.
