celles de la Grande-Rue, de la rue Dessus et de la rue Siroué, par les mesmes Suédois, avec lesquels l’on avoit traitté du faict de la rançon.
Lesquels retournèrent et entrèrent aud. Jussey au commencement du mois de may (erreur) de l’année suyvante, qui fut pour la troisième fois, et y mirent le feug. Auquel temps ledit déposant courut un grand danger, parce que lors il estait aud. Jussey et eut bien de la peine à se sauver. Et quoy que les cloches dud. Jussey n’ayent pas esté enlevées par les Suédois, il ne faut pourtant pas inférer que soit esté à la faveur de lad. composition, mais bien parce que lesd. Suédois s’en chargeoient en nulle part, n’en ayant pas enlevé une dans toute la prévosté dud. Jussey ; et si quelque village en a perdu, ça esté dez la retraite desd. Suédois hors du pays, par le faict de quelques voleurs qui estoient sur la frontière et de Lorraine, tant à Pressigny, Voncourt, Varenne qu’autres lieux,
Dict de plus que lad. composition n’a pas servy à lad. communaulté de Jussey et n’en doibt pas estre chargée, ains les particuliers qui s’estoient retirés au couvent desd. pères capucins ; et lesquels seuls ont proffitez, puisque parmy eulx il y avoit plusieurs personnes estrangères qui estaient comprinses dans lad. composition, entre autres messire Jean Cassin, prestre curé de Sainct-Boin, Sébastien Maire, dud. lieu, Antoine Ligier, de Cendrecourt, Michiel Liefol dud. lieu, Claude-Philippe Ménassier, de Sainct-Marcel, et autres desquels il n’est pas souvenant ; lesquels avoient tous de grands moyens, hormis led. Liefol, et pouvoient eulx seuls payer la majeure part de la somme accordée auxd. Suédois, pour la rançon desd. particuliers retirés aud. Couvent ; lesquels pour ce doibvent payer lesd. rentes qui ont esté constituées à ce subjet, puisqu’ils en ont seuls proffitez, et n’en pas charger lad. communaulté, qui n’en a point heu de proffit.
Qu’est l’entier de sa déposition, par nous deheument et singulièrement enquis ; et lecture à luy faicte, il y a persisté et l’a maintenue véritable, s’estant soubsigné.
P. VALLEY.
