fault pas négliger à la françoise les derniers pas qui couronent l’ouurage.
J’ay signé le billet que vous m’aués enuoié por Monr Du Quesnoy flamend et por Mr Blondeau.
Ne précipités pas vostre retour parce que j’aime mieux estre priué d’un bien qui se peult recouurer que de ce qui ne reuient plus.
Aviourd’huy vingtiesme Mars 1641. Le Roy estant à Sainct Germain en Laye voulant tesmoigner l’estime particuliere que Sa Maiestè faict de la persone du Sieur Poussin, qu’elle a fait venir d’Italie sur la cognoissance particuliere qu’elle a du haut degré d’excellence auquel il est paruenu dans l’art de la peinture, non seulement par les longues estudes qu’il a faictes de toutes les sciences necessaires à la perfection d’iceluy, mais aussi à cause des dispositions naturelles, et des talents que Dieu lui a donné pour les arts. Sa Maiestè l’a choisy et retenu pour son premier Peintre ordinaire, et en cette qualité luy a donnè la direction générale de tous les ouurages de peinture et d’ornemens qu’elle fera cy après faire pour l’embellissement de ses Maisons Royalles, voulant que tous ses autres peintres ne puissent faire aucuns ouurages pour Sa Maiestè sans en auoir fait veoir les desseins et receu sur iceux les aduis et conseils dudit Sieur Poussin, et pour luy donner moyen de s’entretenir à son seruice : Sa Maiestè luy a accordè la somme de trois milles liures de gage par chacun an, qui sera d’oresnauant payée par les
