Le texte de cette page a été corrigé et est conforme au fac-similé.
10 CHANSONS DE CONON DE BÉTHUNE
VI. — Se raige et derverie.
Se raige et derverie
Et destrece d’amer
M’a fait dire folie
Et d’amors mesparler,
Nus ne m’en doit blasmer.
S’ele a tort m’i fausnie,
Amors, qui j’ai servie,
Ne me sai ou fïer.
Amors, de felonie
Vous vaurai esprover ;
Tolu m’avés la vie
Et mort sans deffier.
La m’avés fait penser
Ou ma joie est perie ;
Cele qui jou em prie
Me fait d’autre esperer.
Plus est belle k’imaige
Cele ke je vos di,
Mais tant a vil coraige,
Anuieus et failli,
K’ele fait tot ausi
Com la leuve sauvaige
Ki des leus d’un boskaige
Trait le pieur a li.
N’a pas grant vasselaige
Fait, s’ele m’a traï ;
Nus ne l’en tient por saige
