AU LECTEUR
Amy Lecteur, n’ignorant point que tu ne trouves beaucoup de petites fautes, et quelquefois d’assez remarquables en ce livre, que tu pourras taxer et reprendre (ce qui est tousjours tres-aisé) nous t’avons voulu briefvement advertir par ce mot, que ce n’est point la faute de celle qui a faict c’est oeuvre, comme tu recognoistras facillement, ains de l'imprimeur. Mais tant y a que si tu aymes tant soit peu la lecture des bons livres et à repaistre sainctement ton ame, sans t’amuser à la mesdisance, tu en raporteras un contentement et consolation incroyable, lisant diligemment ceste œuvre Spirituelle, et trouveras que le tout est raporté par ceste honneste et vertueuse Dame, à l’honneur et gloire de Dieu, le seul but et la fin de son entreprinse. Une chose te puis je bien encore asseurer que parmi tant de rares et excellens poëtes de nostre temps à peine y en a-il aucun qui se puisse vanter d’avoir mieux parlé de Dieu ny escrit plus
