Page:Chrétien de Troyes - Roman de Perceval le Gallois - MS 248.pdf/78

De ceste guerre li ocis
Ainz moci biaus dolz amis
Que tu alui aler me faces
La jert ma mort si tu mi chaces
Et il lui dit donc iras tu
En la prison le roi Hartu
Si me salueras le roi
Si lui diras de par moi
Quil te face mostrer celi
Que ques li seneschals feri
Porce que le mavoit ris
Et a celui te rendras pris
Et se li diras si toi plaist
Que ja deus morir ne me laist
Jusque venjance en aie prise
Et il respont que cest servise
Li fera il et bien et bel
Lors sentorne vers le chastel
Li chevals qui vencu la
Et cil en la prison sen va
Sen fait porter son estandart
Et lost del siege sen part
Quil ne remaint ne bruns ne sors
Et cil del chastel eissent hors
Encontre celui qui retorne
Mais a moult grant hënui ont torne
Del cheval. quil ont conquis
Quant il le chief nen avoit pris
Ou quil ne lor ot rendu
A grant joie ont descendu