Page:Chrétien de Troyes - Roman de Perceval le Gallois - MS 248.pdf/123

Si as fait ele que ge sui
Tant chaitive et tant ai henui
Que nus ne me doit saluer
Dangoisse me covient suer
Quant nus ma resne ne esgarde
Voir ge ne me pernoie garde
Fait Percevals de cest mesfait
Por vos faire honte ne lait
Certes ne vïgn ge mie ca
Mais ma voie mi adreca
Et des que ge vos oi veue
Si entreprise et povre et nue
James joie en mon cuer neusse
Si la verite ne seusse
Quele aventure vos demainne
Entel dolor. et en tel paine
Ha. sire fait ele merci
Taisiez vos en fuiez deci
Si me laissiez enpes ester
Pechiez vos fait ci arester
Mais fuiez si feroiz savoir
Ice fait il voil ge savoir
Por quel peor por quel menace
Ja ne fuirai quant nus ne me chace
Sire fait ele or ne vos poist
Mais fuiez tant com il vos loist
Que li orguilleus de la lande
Qui nule chose ne demande
Si bataille non et mesléé
Ne sorveïgne a ceste assembléé