Page:Chrétien de Troyes - Roman de Perceval le Gallois - MS 248.pdf/116

？ nons est changiez biaus amis
Coment Percevals li chaitis
Ha. Percevals maleurez
De con male ore tu fus nez
Quant tu nas tot ce demande
Que moult eusses amande
Le bon roi qui est mehaïgniez
Que toz eust regaaïgniez
Ses membres. et terre renist
Et moult granz bien en avenist
Mais or sachiez que grant hennui
En avandra toi et altrui
Por le pechie ce saches tu
De ta mere test avenu
Quele est morte de duel de toi
Ge te quenois mielz que tu moi
Que tu ne sez qui ge me sui
Ensemble o toi norrie fui
Chief ta mere moult lonc termine
Ge sui ta germaine cosine
Et tu ies mes cosins germains
Ne ne me poise mie mains
De ce quensi test avenu
Que tu nas del graal seu
Que len enfait. ou len le porte
Que de ta mere qui est morte
Quil fait de cest cheval.
Que jamoie et tenoie chier
Mais porce quil me clamoit
Sa chiere amie. et si mamoit