Page:Chrétien de Troyes - Roman de Perceval le Gallois - MS 248.pdf/113

Cest pais ne reverchie tot
Et ioi hostel sanz nul redot
Le meillor que ge eusse onques
Ha sire geustes vos donques
Chies le riche roi Pescheor
Pucele par le salveor
Ne sai sil est peschiere ou rois
Mais moult est riches et cortois
Rien plus dire ne vos ensai
Fors tant que.ii. homes trovai
Ersoir moult tant en une nef
Qui aloient najant soef
Li uns des.ii. homes najoit
Lautres al amecon peschoit
Et cil sa maison men seïgna
Hersoir et si me herberja
La pucele respont biaus sire
Rois est il bien le vos puis dire
Mais il fu en une bataille
Navrez et mehaïgniez sanz faille
Si que puis aidier aidier ne se pot
Quil fu navrez dun javelot
Parmi les hanches ambedos
Sen est encore si angoisos
Qil ne puet son cheval monter
Mais quant il se vielt deporter
Ou daucun deduit entremetre
Si se fait en une nef metre
Et vait peschant al amecon
Porce li rois peschieres a non