Page:Chrétien de Troyes - Cligès, 1921.djvu/96

An chascune chose a portraire,
Et el manton et es oroilles,
Qu’il ne seroit pas granz mervoilles,
Se aucune chose i trespas.
De la boche ne di ge pas
Que vers li ne soit cristax trobles ;
Li cors est plus blans quatre dobles ;
Plus clere d’ivoire est la trece.
Tant con il a des la chevece
Jusqu’au fermail d’antroverture,
Vi del piz nu sanz coverture
Plus blanc que n’est la nois negiee.
Bien fust ma dolors alegiee
Se tot le dart veü eüsse.
Mout volantiers, se je seüsse,
Deïsse quex an est la floiche :
Ne la vi pas n’an moi ne poiche
Se la façon dire n’an sai
De chose que veüe n’ai.
Ne m’an mostra Amors adons
Fors que la coche et les penons,
Car la fleche ert el coivre mise :
C’est li bliauz et la chemise
Don la pucele estoit vestue.
Par foi, c’est li max qui me tue,
Ce est li darz, ce est li rais,
Don trop vilainnemant m’irais.
Mout sui vilains qui m’an corroz.
Ja mes festuz n’an sera roz
Par desfiance ne par guerre,
Que je doie vers Amor querre.
Or face de moi tot son buen,
Si com il doit feire del suen,
Car je le vuel et si me plest,
Je ne quier que cist max me lest.
Mialz vuel qu’ainsi toz jorz me teingne
Que de nelui santez me veingne,