Page:Chrétien de Troyes - Cligès, 1921.djvu/95

Androit de moi jurer porroie
Que rien plus ne desirreroie,
Que seul les penons et la floiche
Ne donroie por Antioiche.
Et quant ces.ii. choses an pris,
Qui porroit esligier le pris
De ce que vaut li remenanz,
Qui tant est biax et avenanz
Et tant boens et tant precieus,
Que desirranz et anvieus
Sui ancor de moi remirer
Le front que Dex a fet tant cler
Que nule rien n’i feroit glace,
Ne esmeraude ne topace ?
Mes an tot ce n’a riens a dire,
Qui la clarté des ialz remire ;
Car a toz ces qui les esgardent
Sanblent.ii. chandoiles qui ardent.
Et qui a boche si delivre,
Qui la face poïst descrivre,
Le nes bien fet et le cler vis,
Com la rose oscure le lis,
Einsi come li lis esface,
Por bien anluminer la face,
Et de la bochete riant
Que Dex fist tele a esciant,
Por ce que nus ne la veïst
Qui ne cuidast qu’ele reïst ?
Et quel sont li dant an la boche ?
Li uns de l’autre si pres toche
Qu’il sanble que il s’antretaingnent ;
Et por ce que mialz i avaingnent,
.I. fist Nature.i. petit d’uevre :
Qui verroit con la bochete oevre,
Ne diroit mie que li dant
Ne fussent d’ivoire ou d’argent.
Tant a a dire et a retraire