Page:Chrétien de Troyes - Cligès, 1921.djvu/90

D’Alixandre vos dirai primes
Comant il se plaint et demante.
Amors celi li represante
Por cui se sant si fort grevé,
Que de son cuer l’a eslevé
Ne nel lesse an lit reposer :
Tant li delite a remanbrer
La biauté et la contenance
Celi, ou n’a point d’esperance
Que ja biens l’an doie venir.
« Por fol, fet il, me puis tenir.
Por fol ? Voiremant sui ge fos,
Qant ce que je pans dire n’os,
Car tost me torneroit a pis.
An folie ai mon panser mis ;
Donc me covient il mialz panser
Que fol me feïsse apeler.
Ja n’iert seü ce que […] vuel ?
Tant celerai ce don me duel,
Ne ne savrai de mes dolors
Aïde querre ne secors ?
Fos est qui sant anfermeté,
Qui n’an quiert aïde et santé
Se il la puet trover nul leu.
Mes tex cuide feire son preu
Et porquerre ce que il vialt,
Qui porchace dom il se dialt.
Et qui ne le cuide trover,
Por coi iroit consoil rover ?
Il se traveilleroit an vain.
Je sant le mien mal si grevain
Que ja n’an avrai garison
Par mecine, ne par poison
Ne par herbe ne par racine.
A chascun mal n’a pas mecine.