Page:Chrétien de Troyes - Cligès, 1921.djvu/89

Mes il ne set ne ne savra
De si que maint mal en avra
Et maint enui por li soffert.
Por s’amor la reïne sert
Et les puceles de la chanbre,
Mes celi don plus li remanbre
N’ose aparler ne aresnier.
S’ele osast vers lui desresnier
Le droit que ele i cuide avoir,
Volantiers li feïst savoir ;
Mes ele n’ose ne ne doit.
Et ce que li uns l’autre voit,
Ne plus n’an puet dire ne feire,
Lor torne mout a grant contraire
Et l’amors acroist et alume ;
Mes de toz amanz est costume
Que volantiers peissent lor ialz
D’esgarder, s’il ne pueent mialz,
Et cuident, por ce qu’il lor plest
Ce dont amors acroist et nest,
Qu’aidier lor doie, si lor nuist :
Tot ausi con cil qui se cuist,
Qui au feu s’aproche et acoste,
Est cil qui arrieres s’an oste.
Adés croist l’amors et si monte ;
Mes li uns a de l’autre honte,
Si se cuevre et çoile chascuns,
Si qu’an n’an pert flame ne funs
Del charbon qui est soz la cendre.
Por ce n’est pas la chalors mandre,
Einçois dure la chalors plus
Desoz la cendre que desus.
Mout sont andui an grant engoisse,
Et por ce qu’an ne les conoisse
Ne lor conplainte n’aparçoive,
Estuet chascun que il deçoive
Par faus sanblant totes les genz.
Mes la nuit est la plainte granz,
Que chascuns fet a lui meïsmes.