Page:Chrétien de Troyes - Cligès, 1921.djvu/86

Chieremant achate et conpere
Son grant orguel et son desdaing.
Amors li a chaufé.i. baing
Qui mout l’eschaufe et mout li nuist.
Or li est boen et or li nuist,
Or le vialt et or le refuse ;
Ses ialz de traïson encuse
Et dit : « Œl, vos m’avez traïe ;
Par vos m’a mes cuers anhaïe,
Qui me soloit estre de foi.
Or me grieve ce que je voi.
Grieve ? Nel fet, ençois me siet,
Et se ge voi rien qui me griet,
Don n’ai ge mes ialz an baillie ?
Bien me seroit force faillie
Et po me devroie prisier,
Se nes pooie justisier
Et feire autre part esgarder.
Einsi me porrai bien garder

D’Amor, qui justisier me vialt,
Car cui ialz ne voit cuers ne dialt ;
Se je nel voi, rien ne m’an iert.
Ja ne me prie il ne requiert :
Amerai le ge s’il ne m’aimme ?
Se sa biautez mes ialz reclaimme
Et mi oel voient le reclaim,
Dirai ge por ce que ge l’aim ?
Nenil, car ce seroit mançonge.
Por ce n’a il an moi chalonge,
Ne plus ne mains n’i puet clamer :
L’an ne puet pas des ialz amer.
Et que m’ont donc forfet mi oel,
S’il esgardent ce que je voel ?
Quex corpes et quel tort ont il ?