Au conte Angrés de Guinesores,
Car il ne cuidoient ancores
Qu’il eüst baron plus de foi
An tote la terre le roi.
Qant cil tint la terre an sa main,
Li rois Artus mut l’andemain,
La reïne et ses dameiseles.
An Bretaigne oent les noveles
Que li rois vient et si baron,
Mout font grant joie li Breton.
En la nef ou li rois passa
Vaslet ne pucele n’antra
Fors Alixandre seulemant ;
Et la reïne voiremant
I amena Soredamors,
Qui desdaigneuse estoit d’amors :
Onques n’avoit oï parler
D’ome qu’ele deignast amer,
Tant eüst biauté ne proesce,
Ne seignorie ne hautesce.
Et neporquant la dameisele
Estoit tant avenanz et bele
Que bien deüst d’amors aprandre
Se li pleüst a ce antandre,
Mes onques n’i volt metre antante.
Or la fera Amors dolante
Et mout se cuide bien vangier
Del grant orguel et del dangier
Qu’ele li a toz jorz menee.
Bien l’a Amors droit assenee :
El cuer l’a de son dart ferue.
Sovant palist, sovant tressue,
Et maugré suen amer l’estuet.
A grant poinne tenir se puet
Que vers Alixandre n’esgart ;
Mout li estuet qu’ele se gart
De monseignor Gauvain, son frere.
Page:Chrétien de Troyes - Cligès, 1921.djvu/85
Cette page n’a pas encore été corrigée
