Page:Chrétien de Troyes - Cligès, 1921.djvu/83

Retenez moi, rois debonaire,
Et mes conpaignons qui ci sont. »
Li rois tot maintenant respont :
« Amis, fet il, ne refus mie
Ne vos ne vostre conpaignie,
Mes bien veignant soiez vos tuit,
Car bien sanblez, et je le cuit,
Que vos soiez fil de hauz homes.
Dom estes vos ? — De Grece somes.
-De Grece ? — Voire. — Qui est tes peres ?
-Par foi, sire, li empereres.
-Et comant as non, biax amis ?
-Alixandres me fu nons mis
La ou ge reçui sel et cresme
Et crestianté et baptesme.
-Alixandre, biax amis chiers,
Je vos retieng mout volantiers
Et mout me plest et mout me heite,
Car mout m’avez grant enor feite,
Qant venuz estes a ma cort.
Mout vuel que l’en vos i enort
Com franc vaslet et sage et dolz.
Trop avez esté a genolz :
Relevez sus, jel vos comant,
Et soiez des ore en avant
De ma cort et de mes privez,
Qu’a boen port estes arivez. »
Atant se lievent li Grezois ;
Lié sont, quant si les a li rois
Deboneiremant retenuz.
Bien est Alixandres venuz,
Car a rien qu’il vuelle ne faut,
N’an la cort n’a baron si haut
Qui bel ne l’apialt et acuelle.
Et cil, qui pas ne s’an orguelle
Ne plus n’an est nobles ne cointe,
A monseignor Gauvain s’acointe