Page:Chrétien de Troyes - Cligès, 1921.djvu/82

Por ce que biax et genz les voient,
Car li vaslet mout lor pleisoient ;
Ne cuident pas que il ne soient
Tuit de contes et de roi fil,
Et por voir si estoient il.
Mout par sont bel de lor aage,
Gent et bien fet, de lonc corssage ;
Et les robes que il vestoient
D’un drap et d’une taille estoient,
D’un sanblant et d’une color.
Doze furent sanz lor seignor,
Dont je vos dirai tant sanz plus
Que miaudres de lui ne fu nus,
Mains sanz orguel et sanz desroi.
Desfublez fu devant le roi,
Qui mout fu biax et bien tailliez ;
Devant lui s’est agenoilliez
Et tuit li autre par amor
S’agenoillent lez lor seignor.
Alixandres le roi salue,
Qui la leingue avoit esmolue
A bien parler et sagemant.
« Rois, fet il, se de vos ne mant
Renomee qui vos renome,
Des que Dex fist le premier home,
Ne nasqui de vostre puissance
Rois qui an Deu eüst creance ;
Rois, li renons qui de vos cort
M’a amené a vostre cort
Por vos servir et enorer,
Et s’i voldrai tant demorer
Que chevaliers soie noviax,
Se mes servises vos est biax,
De vostre main, non de l’autrui ;
Car se de la vostre nel sui,
Ne serai chevaliers clamez.
Se vos tant mon servise amez
Que chevalier me vuilliez faire,