Page:Chrétien de Troyes - Cligès, 1921.djvu/81

Et venu la, ou il voloient.
Por ce que formant se doloient,
Desoz Hantone se remainnent
La nuit et grant joie demainnent
Et font demander et anquerre
Se li rois est an Eingleterre.
L’an lor dist qu’il est a Guincestre
Et que mout tost i porront estre
S’il vuelent lever par matin
Et s’il tienent le droit chemin.
Li vaslet par matin s’esvoillent,
Si s’atornent et aparoillent ;
Et quant il furent atorné,
De Hantone s’an sont torné,
Si ont le droit chemin tenu
Tant qu’a Guincestre sont venu,
Ou li rois estoit a sejor.
Einçois qu’il fust prime de jor,
Furent a cort venu li Gré.
Au pié descendent del degré ;
Li escuier et li cheval
Remestrent an la cort aval,
Et li vaslet montent amont
Devant le meillor roi del mont
Qui onques fust ne ja mes soit.
Et quant li rois Artus les voit,
Mout li pleisent et abelissent ;
Mes ainz que devant lui venissent,
Ostent les mantiax de lor cos,
Que l’an ne les tenist por fos.
Einsi trestuit desafublé
An sont devant le roi alé.
Et li baron trestuit se teisent ;
Que li vaslet formant lor pleisent