Page:Chrétien de Troyes - Cligès, 1921.djvu/80

Au congié de l’empererriz,
Qui le cuer a dolant el vantre,
De la nef el batel s’an antre ;
Et si conpaignon avuec lui,
Ansanble quatre, troi et dui,
Tancent d’antrer sanz atandue.
Tantost fu la voile tandue
Et la barge desaencree.
Cil de terre, cui pas n’agree
Del vaslet que aler an voient,
Tant con il pueent les convoient
De la veüe de lor ialz ;
Et por ce que il puissent mialz
Et plus longuemant esgarder,
S’an vont tuit ansanble monter
Lez la marine an.i. haut pui.
D’iluec esgardent lor enui ;
Tant con il pueent plus veoir
Lor ami, l’esgardent por voir,
Que del vaslet mout lor enuie,
Et Dex a droit port le conduie
Sanz anconbrier et sanz peril !
En la mer furent tot avril
Et une partie de mai.
Sanz grant peril et sanz esmai
Vindrent au port desoz Hantone.
.I. jor antre vespres et none
Gietent encre, si ont port pris.
Li vaslet, qui n’orent apris
A sofrir meseise ne painne,
En mer, qui ne lor fu pas sainne,
Orent longuemant demoré,
Tant que tuit sont descoloré,
Et afebli furent et vain
Tuit li plus fort et li plus sain.
Et neporquant grant joie font
Quant de la mer eschapé sont