Page:Chrétien de Troyes - Cligès, 1921.djvu/74

Qu’an Grece ot de chevalerie
Le premier los et de clergie:
Puis vint chevalerie a Rome
Et de la clergie la some,
Qui or est an France venue.
Dex doint qu’ele i soit maintenue
Et que li leus li abelisse
Tant que ja mes de France n’isse
L’enors qui s’i est arestee.
Dex l’avoit as altres prestee,
Car des Grezois ne des Romains
Ne dit an mes ne plus ne mains,
Et estainte la vive brese.
Crestiens comance son conte,
Si con li livres nos reconte,
Qui trez fu d’un empereor
Puissant de richesce et d’enor,
Qui tint Grece et Costantinoble.
Empereriz ot cointe et noble,
Don l’emperere ot.ii. enfanz.
Mes ainz fu li premiers si granz
Que li autres nessance eüst
Que li premiers, se lui pleüst,
Poïst chevaliers devenir
Et tot l’empire maintenir.
Li premiers ot non Alixandres,
Alis fu apelez li mandres.
Alixandres ot non li pere
Et Tantalis ot non la mere.
De l’empereriz Tantalis,
De l’empereor et d’Alis
La parole a tant lesseron;
D’Alixandre vos conteron,
Qui tant fu corageus et fiers
Que il ne deigna chevaliers