Page:Chrétien de Troyes - Cligès, 1921.djvu/256

Onques ne but ne ne manja,
Si morut con huem forssenez.
Biax sire, or vos an revenez,
Car tuit vostre baron vos mandent,
Mout vos desirrent et demandent,
Empereor vos voelent feire. »
Tel l’oent qui de cest afeire
Furent lié, s’en i ot de tex
Qui esloignassent lor ostex
Volantiers et mout lor pleüst
Que l’oz vers Grece s’esmeüst.
Mes remeise est del tot la voie,
Car li rois ses genz en envoie,
Si s’en depart l’oz et atorne.
Et Cligés se haste et atorne,
Qu’an Grece s’en vialt retorner,
N’a cure de plus sejorner.
Atornez s’est, congié a pris
Au roi et a toz ses amis.
Fenice an mainne, si s’en vont ;
Ne finent tant qu’an Grece sont,
Et a grant joie le reçurent,
Si con lor seignor feire durent,
Et s’amie a fame li donent,
En.ii. ansanble les coronent.
De s’amie a feite sa dame,
Car il l’apele amie et dame,
Et por ce ne pert ele mie
Que il ne l’aint come s’amie,
Et ele lui tot autresi
Con l’en doit amer son ami.
Et chascun jor lor amors crut,
Onques cil de li ne mescrut,
Ne querela de nule chose ;
N’onques ne fu tenue anclose
Si com ont puis esté tenues
Celes qu’aprés li sont venues ;