Page:Chrétien de Troyes - Cligès, 1921.djvu/254

Qui einçois, se il le trovoient,
A sauveté le conduiroient
Qu’il le ramenassent arriere.
Trestote la quinzainne antiere
Les ont chaciez a quelque painne.
Mes Tessala, qui les an mainne,
Les conduist si seüremant
Par art et par anchantemant
Que il n’ont crieme ne peor
De tot l’esforz l’empereor.
N’en vile n’an cité ne gisent,
Et si ont quanque il devisent,
Autresi ou mialz qu’il ne suelent,
Car Tessala quanque il vuelent
Lor aporte et quiert et porchace ;
Ne nus nes silt mes ne ne chace,
Car tuit se sont mis el retor.
Mes Cligés n’est mie a sejor :
Au roi Artus son oncle en va ;
Tant le quist que il le trova,
S’a a lui fet plainte et clamor
De son oncle l’empereor,
Qui por son desheritemant
Avoit prise desleaumant
Fame, que prandre ne devoit,
Qu’a son pere plevi avoit
Que ja n’avroit fame en sa vie.
Et li rois dit que a navie
Devant Costantinoble ira
Et de chevaliers emplira
Mil nes et de sergenz trois mile,
Tex que citez ne bors ne vile
Ne chastiax, tant soit forz ne hauz,
Ne porra sosfrir lor assauz.
Et Cligés n’a pas oblié
Que lors n’ait le roi mercié
De s’aïde qu’il li otroie.