Page:Chrétien de Troyes - Cligès, 1921.djvu/253

Con s’an veillant vos avenist
Qu’ele antre ses braz vos tenist,
N’autres biens ne vos an venoit.
Ses cuers a Cligés se tenoit
Tant que por lui morte se fist ;
Si me crut tant qu’il le me dist,
Et si la mist en ma meison,
Dont il est sires par reison.
Ne vos an devez a moi prendre :
L’en me deüst ardoir ou pendre
Se je mon seignor refusasse
Et de son voloir l’encusasse. »
Qant l’emperere ot ramentoivre
La poison qui li plot a boivre,
Par coi Tessala le deçut,
Lors primes sot et aparçut
C’onques de sa fame n’avoit
Eü joie, bien le savoit,
Se il ne li avint par songe ;
Mes ce fu joie de mançonge,
Et dit, se il n’en prant vengence
De la honte et de la viltence
Que li traïtes li a faite,
Qui sa fame li a fortraite,
Ja mes n’avra joie an sa vie.
« Or tost, fet il, jusqu’a Pavie,
Et de ça jusqu’an Alemaigne,
Chastel ne vile n’i remaigne
Ne cité ou il ne soit quis.
Qui an.ii. les amanra pris,
Plus l’avrai que nul home chier.
Or del bien querre et del cerchier
Et sus et jus et pres et loing. »
Tuit s’esmuevent com a besoing,
S’ont au querre tot le jor mis ;
Mes Cligés a de tex amis