Page:Chrétien de Troyes - Cligès, 1921.djvu/249

Vez ci Bertran ! S’il nos eschape,
Cheü somes an male trace :
Il dira qu’il nos a veüz. »
Lors s’est Bertranz aparceüz
Que c’est l’empererriz sanz faille.
Mestiers li est que il s’an aille,
Car Cligés avoit aportee
El vergier avuec lui s’espee,
Si l’avoit de devant aus mise.
Il saut sus, s’a l’espee prise,
Et Bertranz fuit isnelemant,
Plus tost qu’il pot au mur se prant,
Et oltre estoit ja a bien pres
Qant Cligés li vint si de pres,
Et maintenant hauce l’espee,
Sel fiert si qu’il li a colpee
La janbe desor le genoil,
Ausi con.i. raim de fenoil.
Neporquant s’an est eschapez
Bertranz, malmis et esclopez.
Qant les genz d’autre part le voient,
Par po que de duel ne desvoient,
Qant si le voient afolé.
Maintenant li ont demandé
Qui est qui ce li avoit fet.
« Ne me metez, fet il, an plet,
Mes sor mon cheval me montez.
Ja cist afeires n’iert contez
Jusque devant l’empereor.
Ne doit pas estre sanz peor
Qui ce m’a fet, voir non est il,
Car pres est de mortel peril. »
Lors l’ont mis sor son palefroi,
Si l’en mainnent a grant esfroi,
Lor duel feisant aval la vile.
Aprés aus vont plus de XX mile,
Qui s’an vindrent droit a la cort,