Page:Chrétien de Troyes - Cligès, 1921.djvu/248

Bachelers, juenes, anvoisiez,
De chevalerie prisiez,
Fu un jor an gibiers alez
Vers cele tor tot lez a lez.
Bertranz ot non li chevaliers.
Essorez fu ses espreviers,
Qu’a une aloete a failli.
Or se tandra por malbailli
Bertranz s’il pert son esprevier.
Desoz la tor, anz el vergier
Le vit descendre et aseoir,
Et ce li plot mout a veoir :
Or ne le cuide mie perdre.
Tantost se vet au mur aerdre
Et fet tant que oltre s’an passe.
Soz l’ante vit dormir a masse
Fenice et Cligés nu a nu.
« Dex, fet il, que m’est avenu !
Quiex mervoille est ce que je voi ?
N’est ce Cligés ? Oïl, par foi.
N’est ce l’empererriz ansanble ?
Nenil, mes ceste la resanble,
Que riens autre si ne sanbla.
Tel nes, tel boche, tel front a
Con l’empererriz ma dame ot.
Onques mes Nature ne sot
Feire.ii. choses d’un sanblant.
An cesti ne voi je neant
Que an ma dame ne veïsse.
S’ele fust vive, je deïsse
Veraiemant que ce fust ele. »
Atant une poire destele,
Si chiet Fenice sor l’oroille ;
Ele tressaut et si s’esvoille
Et voit Bertran, si crie fort :
« Amis, amis, nos somes mort.