Page:Chrétien de Troyes - Cligès, 1921.djvu/247

N’aillors ne se quiert herbergier.
Puis est antree an un vergier,
Qui mout li plest et atalante.
Enmi le vergier ot une ante
De flors chargiee et bien foillue
Et par dedesoz estandue.
Ensi estoient li rain duit
Que par terre pandoient tuit
Et pres de la terre baissoient,
Fors la cime dom il nessoient.
La cime aloit contremont droite.
Fenice autre leu ne covoite.
Et desoz l’ante ert li praiax,
Mout delitables et mout biax,
Ne ja n’iert tant li solauz chauz
An esté, quant il est plus hauz,
Que ja rais i puisse passer,
Si le sot Jehanz conpasser
Et les branches mener et duire.
La se va Fenice deduire,
Si a fet soz l’ante son lit ;
La sont a joie et a delit.
Et li vergiers ert clos antor
De haut mur qui tient a la tor,
Si que riens nule n’i montast
Se par la tor sus n’i entrast.
Or est Fenice mout a eise,
N’est riens nule qui li despleise
Qant sor les flors ne sor la fuelle
Ne li faut riens que ele vuelle :
Son ami li loist anbracier.
El tans que l’en vet an gibier
De l’esprevier et del brachet
Qui quiert l’aloe et le maslet,
Et la quaille et la perdriz trace,
Avint c’uns chevaliers de Trace,